可以問邊個？
如果你諗唔到邊個適合做你嘅推薦人，唔緊要～初入職場，冇人脈關係或者前僱主係完全正常嘅！其實你仲有好多人選可以揀！
專業推薦
當僱主/招聘人員要求提供推薦人時，通常都係指專業推薦。專業推薦要搵你以前共事過嘅人，因為佢哋可以評論你嘅工作經驗、職業道德、能力同表現。
-前上司/經理
不論係暑期工/兼職/實習時嘅上司都可以！
-前HR
負責聘請你嘅人力資源人員。
-前或現任同事
都可以歸類為「性格推薦」（見下文）。通常選擇比你職位稍高嘅人，因為他們有分配工作畀你或者同你合作嘅經驗。
性格推薦
如果你冇足夠嘅專業推薦，性格推薦都係一個唔錯嘅選擇，因為性格推薦可以反映提你嘅態度同工作能力。
-大學教授/講師/學術指導/個人導師
喺學校嘅相處中，佢哋往往了解到你嘅工作態度、個性、職業道德同職業抱負，絕對係好好嘅選擇。
其他你可以聯繫嘅人包括：
-教練
-義工服務領導者
-學生組織主席
-有工作地位嘅家中長輩
選擇合適人選
毫無疑問，你應該揀個同你關係良好嘅人做你推薦人。
佢哋應該對你嘅能力感到滿意，同埋對你嘅個性都有一定理解，最好仲同你申請嘅行業相關添！
邀請
喺請求某人做你嘅推薦人時，通常send email就係最好嘅方式 - 一嚟冇打電話咁尷尬，而且對方可以輕易禮貌咁拒絕，對於雙方嚟講都易處理啲！。但如果你淨係可以透過電話搵你嘅潛在推薦人，你都可以試吓透過訊息溝通。
-概括講吓你申請緊嘅職位
-解釋點解你覺得佢哋係推薦人嘅人選
-講吓你近況，最好就附上你嘅CV畀佢哋參考
之後應該點做？
-畀足夠時間人哋回覆： 提早準備並喺離開每個職位/實習前請求你嘅上司成為你嘅推薦人
-做足幾手準備：邀請多幾個合適嘅人選做你推薦人
-表達謝意：不論你邀請嘅人願唔願意成為你嘅推薦人，你都一定要好好感謝人哋花時間考慮
-告知最新進展：話畀你嘅推薦人知你嘅工作申請進度，等佢哋有心理準備聽HR電話
總結
搵推薦人喺求職過程中非常重要，希望你睇完上文之後對於搵推薦人更有信心啦！想知道更多面試/求職貼士？GradConnection有好多文章幫到你！