介紹
依家就業市場競爭激烈，寫到一封出色嘅求職信可以為你帶來向僱主展示自己嘅技能、經驗同個性嘅機會，助你喺眾多求職者中脫穎而出。 本文中將分享數個撰寫求職信嘅策略，令你喺僱主心中留下深刻印象。
做足功課，添加個人風格
喺開始寫求職信之前，花啲時間研究你申請嘅公司及職位，並按照職位描述（job description）撰寫求職信（你可以適量咁喺求職信上加入職位描述嘅關鍵詞）。你仲可以喺信中表達自己對相關職位/行業嘅熱誠，情理兼備咁打動僱主。
另外，能夠寫出求職信收件人嘅名字會加分！如果招聘廣告冇提及招聘者嘅名字，你可以嘗試聯繫公司嘅人力資源部門或喺LinkedIn上尋找招聘人員嘅資料。
引人入勝嘅開場白
電影往往會用震撼嘅開場白吸引觀眾注意力，而求職信亦應一樣。首先講吓你申請緊咩職位，而你點解咁想返呢份工。用有趣嘅事實、個人故事或經歷去表達你有幾熱衷，吸引HR繼續讀落去。
突出相關技能和經驗
求職信嘅精髓在於突顯你嘅技能、經驗同個人成就。你要喺信中表達到你嘅個人資歷符合工作需求，例如你點樣喺以往嘅學習同工作經驗中掌握到你申請的崗位所需要的工作技能。
寫求職信≠將簡歷複製貼上！你應該深入咁列舉你適合依個職位嘅關鍵經驗同成就。 如果可能嘅話，列出一啲數據或可量化嘅成就，畀僱主知道你有幾犀利。
表達真誠嘅熱情
僱主鍾情對職位同公司都充滿真正熱情嘅應徵者。 喺求職信中，你應該說明有乜嘢吸引你加入佢哋公司，深入研究公司嘅價值觀、使命同近期嘅成就，充分展示你對公司嘅關心同熱情，以打動僱主。
留意求職信嘅格式同結構
一封結構良好嘅求職信真係非常吸引僱主嘅眼球。你應該係正文前寫上你嘅聯絡資料，用友好嘅問候語開啟正文，簡而精咁用三至四段概述一切並以結束語總結全文。另外，記住揀一種易於閱讀嘅字體，並確保格式保持一致。寄出之前一定要審慎校對，確保唔會因為錯別字而影響你嘅印象分！
結束語同行動呼籲
喺求職信總結部分, 記住重申你對職位嘅興趣以及你嘅資歷如何符合工作需求, 表達能夠申請該職位嘅謝意，並說明自己充滿能力同信心為組織做出貢獻。你更可以以友好嘅邀請結束全文，例如邀請招聘人員會談或表示自己可以提供補充資料。
喺競爭激烈嘅畢業生就業市場中，寫出一封令人印象深刻嘅求職信會令僱主對你刮目相看。 通過研究你申請嘅職位、然後個性化你嘅寫作並突出相關技能同經驗，將會大大增加你獲得面試嘅機會。 加油！